საიტზე მიმდინარეობს ტექნიკური სამუშაოები

საქართველო-ისრაელის ერთობლივი სამეცნიერო კვლევის პრეზენტაცია ქ. აშდოდში

ამა წლის 6 ნოემბერს, ქ. აშდოდის მუნიციპალიტეტის სხდომათა დარბაზში გაიმართა შოთა რუსთაველის ეროვნულ საერთაშორისო ფონდის კონკურსში - „უცხოეთში მოღვაწე თანამემამულეთა მონაწილეობით ერთობლივი კვლევები“ - გამარჯვებული, საქართველო-ისრაელის ერთობლივი (თბილისის სახელმწიფო უნივერსიტეტი - არიელის უნივერსიტეტი) სამწლიანი სამეცნიერო პროექტისადმი - „ქართველ ებრაელთა მეტყველება ისრაელში“ - მიძღვნილი კონფერენცია. კონფერენციას უძღვებოდა პროექტის სამეცნიერო ხელმძღვანელი, არიელის უნივერსიტეტის პროფესორი და კავკასიისა და ცენტრალური აზიის ებრაული თემების საკვლევი ინსტიტუტის დირექტორი რეუვენ ენოხი. პროექტის არსზე, მიზანსა და შედეგებზე მოხსენებები წაიკითხეს მოქმედი სამეცნიერო ჯგუფის წევრებმა, მეცნიერებმა: თამარ ლომთაძემ (პროექტის ხელმძღვანელი) ლალი გულედანმა, პროექტის მონაწილე ახალგაზრდა მეცნიერ-თანამშრომლებმა ანი კვირიკაშვილმა და რიტა ჯაიანმა. ენათნეცნიერების და სოციოლოგიის სფეროში განხორციელებულ ამ მნიშვნელოვან შრომაზე ვრცლად ისაუბრა იერუსალიმის უნივერსიტეტის სოციოლინგვისტიკისა და ანთროპოლოგიის კათედრის ხელმძღვანელმა, პროფესორმა ხენ ბრამმა, პროფესორმა გერშონ წიწუაშვილმა, დავიდ ბოთერამ და თავად პროექტის ხელმძღვანელმა რეუვენ ენოხმა. გამომსვლელებმა ხაზი გაუსვეს, ხსენებული პროექტის როგორც სამეცნიერო ისე საზოგადოებრივ და პოლიტიკურ მნიშვნელობას და აღნიშნეს, რომ იგი ქართული და ებრაული ენების ენათმეცნიერული საკითხების კვლევისა და შესწავლის სერიოზულ შენაძენს წარმოადგენს. პროექტის წარმატებით დასრულება მეცნიერთა ჯგუფს მიულოცა ქ. აშდოდის ვიცე-მერმა ბატონმა მოშე ბოთერაშვილმა და საქართველოს საელჩოს მრჩეველმა მანანა დუმბაძემ.
დაინტერესებულ პირებს პროექტის სრული (საცდელი) ვერსია შეუძლიათ იხილონ ვებგვერდზე: www.gjsi.com.ge